Wananchi Maswa wahamasishwa matumizi ya lishe bora

Posted on: February 15th, 2023

Afisa mbogamboga na matunda kutoka Divisheni ya Kilimo, Mifugo na Uvuvi Halmashauri ya Wilaya ya Maswa Ndg.  Masalu Shibiliti Lusana ametoa elimu kwa wananchi kuhusu matumizi sahihi ya lishe bora  ili kuepukana na magonjwa.

Akizungumza na wananchi katika mkutano huo uliofanyika tarehe 14 February 2023 katika viwanja vya mnadani vilivyopo Kitongoji cha Mnadani Kata ya Nyalikungu  Ndg. Shibiliti amewaeleza wananchi  umuhimu wa matumizi ya mbogamboga, matunda, viazi lishe na mahindi lishe jinsi ambavyo inasaidia kinga ya mwili, kuongeza uono na kutokuzeeka mapema kwa kuwa  vyakula hivyo vina viini lishe na virutubisho ambavyo havipatikani sehemu nyingine.

Pia Afisa mbogambonga amewaomba wanachi kulima mbogamboga  mfano mchicha, kunde, chainizi na matunda ya asili kama vile limbe, machungwa, mapapai na ukwaju ambapo mwananchi mwenyewe anaweza kulima nyumbani kwake kwa kuwa itamsaidia kuepukana na matumizi ya mboga ambazo zimelimwa na  kupuliziwa viuatilifu ambavyo vinachangia kwa kiasi kikubwa magonjwa.

Ndg. Shibiliti amewasisitiza wananchi kulima malando lishe  kwa kuwa ni lando linalokomaa haraka, Lina mavuno mengi  ya viazi vya njano ambavyo vina virutubisho vingi pamoja na mahindi lishe ambayo yana kiini tete Cha njano ambacho ni muhimu kwa wazee kujenga kinga ya mwili.

Nae Afisa udongo kutoka Divisheni ya Kilimo, Mifugo na Uvuvi  kutoka Halmashauri ya Wilaya ya Maswa Ndg. Charles Maganga amewahakikishia wananchi hao udongo wa maeneo yao ni mzuri kwa kilimo Cha mbogamboga, matunda pamoja na viazi lishe hivyo wananchi hao wanatakiwa kulima maana tafiti zilishafanyika na kuonyesha matokeo mazuri hasa katika viazi lishe ambavyo vimefanya vizuri katika Kata ya Shishiyu.

Kwa upande wake mtaalamu wa  Mifugo Kata ya Nyalikungu Ana  amewashauri wananchi kutumia nyama nyeupe ambazo ni kuku, samaki na dagaa kwa kuwa ina virutubisho vizuri ambavyo vitasaidia kuukinga mwili na magonjwa mbalimbali kama vile kansa na magonjwa mengine.

Nae mwenyekiti wa kitongoji cha mnadani amewashukuru wataalamu  wa lishe kwa kuwapatia elimu hiyo na wameahidi kuitekeleza kwa vitendo kwa kuwa mabalozi wazuri katika maeneo yao  kwa  kuandaa mashamba darasa ili wananchi wapate elimu hiyo kwa vitendo na kuepukana na ulaji mbovu wa vyakula usiofata lishe Bora.