Walimu Wakuu na Maafisa Elimu Kata Maswa wapigwa msasa kuhusu jumuiya za kujifuza

Posted on: December 9th, 2023

Wizara ya Elimu, Sayansi na teknolojia kupitia wakala wa maendeleo ya uongozi wa Elimu ADEM imetoa mafuzo ya jumuiya  za kujifunza   kwa walimu wakuu 135 kutoka shule 135 za Wilaya ya Maswa  na Maafisa Elimu Kata 36  yenye lengo la  kujua mbinu mbalimbali za kutatua changamoto na kuongeza ufanisi katika majukumu yao.

Mafunzo hayo yalifanyika kwa siku 4  katika shule ya msingi Shanwa iliyopo Kata ya sola kupitia mradi wa Shule Bora ulifadhiliwa na serikali ya uingereza kupitia mfuko wa UKaid.

Ester Marwa Mratibu wa mradi wa Shule Bora Mkoa wa Simiyu  alitoa wito kwa Maafisa Elimu Kata na Walimu wakuu  kuhusu mafunzo waliyoyapata yakawe chachu ya kuboresha mbinu za uongozi na kiutawala katika ngazi zao za shule na Kata kwa kushirikiana, kuboresha mawasiliano na kutumia lugha nzuri za kiuongozi katika kutoa taarifa ili zilete motisha kwa walimu.

Pia aliongeza kuwa mafunzo yamelenga kuanzisha jumuiya kulingana na jeografia za maeneo Yao ambazo zitawasaidia kukutana mara kwa mara ili kubadilishana uzoefu na kupeana mbinu mpya zitakazowawezesha kushirikiana na kutatua changamoto mbalimbali ili kuleta ufaulu kwa wanafunzi.

"Tunaamini kupitia mafunzo haya yatakuwa ni mwendelezo kwa sababu watakuwa wakikutana katika jumuiya hizi kubadilishana uzoefu na hadithi za mafanikio na Kila mmoja ataiga mazuri hivyo tutaboresha uongozi na walimu watafanya kazi kwa juhudi na kwa moyo na matokeo ya wanafunzi yatakwenda kuboreka sana kutokana na uongozi wa walimu hao". Alisema Mratibu wa Mkoa

Nae  Richard Sungura Mkufunzi kutoka ADEM Mwanza alisema mafunzo hayo yanaenda kuleta mabadiliko makubwa  Wilaya ya Maswa kwa kuwa viongozi wamebeba dhamana ya suluhisho la matatizo yote yanayowakabili walimu na wanafunzi.

" Kiongozi atapimwa kutokana na uwezo wake wa kukabiliana na changamoto, ili uweze kuwa na ufanisi katika kukabiliana na changamoto jitathmini uone wapi umepungua na ujiimalishe na kiongozi hatakiwi kukata tamaa." Alisema mkufunzi Sungura

Afisa Elimu taaluma Wilaya ya Maswa Mwl  Neema Makundi ambaye pia ni Mratibu wa mradi wa Shule Bora Wilaya aliwashukuru programu ya shule Bora na wawezeshaji mahiri kutoka ADEM kwa kuwawezesha walimu mambo mengi ambayo yatakwenda kuleta matokeo chanya katika usimamizi wa Elimu katika maeneo Yao.

Mwl Makundi alisema jumuiya za ufundishaji zitawasaidia kuwaweka pamoja kujadili changamoto mbalimbali wanazokutana nazo katika maeneo Yao ya kazi katika usimamizi wa Elimu na kutatua migogoro.

" Mafunzo haya yamekuja katika wakati muafaka kwa maana katika shule zetu changamoto ni nyingi ukisimama peke yako huwezi kufanya, lakini  mnapokaa na mkashirikiana pamoja mna uwezo wa kufanya vizuri zaidi." Alisema mratibu wa mradi Wilaya

Kwa upande wake Mwl Emmanuel Makoye kutoka shule ya msingi Kakola aliishukuru progamu ya shule Bora kwa kuleta mafunzo hayo ya jumuiya za ujifuzaji kwa kuwa inaenda kuwa tiba ya kutatua migogoro kwa sababu jumuiya hizo  zitaleta umoja na mshikamano baina yao

Mwl Ada  Dizaya kutoka shule ya msingi Mkapa iliyopo Kata ya Kadoto alisema mafunzo hayo yamemjengea uwezo wa kwenda kufanya vizuri zaidi katika kituo chake Cha kazi na jamii inayonzunguka kwa sababu ataweza kutatua changamoto mbalimbali kwa  sababu amejifunza mbinu mbalimbali kwa ufanisi.

"Mimi nafurahi sana kupata mafunzo haya, na mafunzo haya yaendelee ili kusudi yaweze kutusaidia na kutupa Elimu zaidi lengo kuu kuinua Elimu kama lengo lilivyokusudiwa." alisema mwl Dizaya