KAMATI YA ULINZI NA USALAMA YATEMBELEA MIRADI YA MAENDELEO

Posted on: December 11th, 2024

Kamati ya Ulinzi na Usalama Wilaya ya Maswa ikiongozwa na Mwenyekiti wa Kamati hiyo ambaye pia ni Mkuu wa Wilaya ya Maswa Mhe Aswege Kaminyoge imeanza ziara ya siku tatu yenye lengo la kukagua utekelezaji wa miradi ya Elimu, Afya na Kilimo.

Mwenyekiti wa Kamati hiyo amesema maelekezo ya Mhe Wazari Mkuu kwa wakuu wa Wilaya na Wakuu wa Mikoa ni kuhakikisha kuwa  miradi yote iliyopokea  pesa inatakiwa kukamilika ifikapo Desemba  30, 2024 ili Januari ianze kutoa huduma.

Aidha Mhe Kaminyoge amewataka mafundi wanaotekeleza  miradi hiyo kuhakikisha wanaongeza vibarua na kuwalipa fedha kwa wakati ili  miradi hiyo   iende kwa kasi na kwa ubora unaotakiwa.

“Miundombinu ipatikane yenye ubora lakini wananchi waseme pesa aliyoleta Mhe Rais imewanufaisha wote” amesema Mkuu wa Wilaya

Kamati hiyo imetembela na kukagua ujenzi wa shule mpya ya sekondari katika kijiji cha Isageng’he Kata ya Sukuma, ujenzi wa Zahanati katika Kijiji cha Mandang’ombe na Mbaragane Kata ya Mbaragane, ujenzi wa nyumba ya mwalimu (2 in1 ) katika shule ya sekondari Dakama.

Pia Kamati hiyo imekagua ujenzi wa shule mpya ya Sekondari katika Kata ya Mwabaraturu na ujenzi wa vyumba 3 vya madarasa na matundu 6 ya vyoo katika shule ya msingi Budekwa Kata ya Budekwa.

Kwa upande wake Kaimu Mkurugenzi Mtendaji wa Halmashauri ya Wilaya ya Maswa Julius John amesema kuwa upungufu wa wazabuni wanaoomba kazi kwenye mfumo wa NEST unaleta changamoto katika utekelezaji wa miradi kwa kuwa mpaka sasa mzabuni ni mmoja tu  anayesambaza madini ujenzi.

Kaimu Mkurugenzi amesema Halmashauri imeendelea kutatua changamoto hiyo  ili kuhakikisha utekelezaji wa ujenzi wa miradi hiyo unaendelea ili miradi hiyo ikamilike kwa wakati.