DC AZINDUA ANWANI ZA MAKAZI NA POSTICODE

Posted on: March 15th, 2022

Mkuu wa wilaya ya maswa Mh. Aswege Kaminyoge  amezindua rasmi operesheni ya uwekaji wa anwani  za makazi na postikode itakayotekelezwa wilayani Maswa.

Operesheni hiyo imezinduliwa leo March 15 katika eneo  la Madeko na kuhudhiriwa na viongozi mbalimbali wa wilaya wakiwemo Kamati ya ulinzi na usalama wilaya, Kamati ya anwani  za makazi, wataalamu wengine wa halmashauri, Vijana watakao husika katika zoezi la ukusanyaji taarifa za anuani za makazi  pamoja na wananchi.

Akizungumza wakati wa uzinduzi wa kuweka  kibao cha anwani  katika Barabara ya Uhuru na Kadoto iliyopo hapa Maswa Mkuu huyo wa Wilaya amesema Barabara hizo ndizo zitakazotumika katika utambuzi wa anwani  za makazi (postikode) na zoezi hilo litaendelea maeneo yote ya Wilaya ya Maswa.

Mh. Kaminyoge  ameongeza kuwa Rais wa Jamhuri ya Muungano wa Tanzania Mh. Samia  Suluhu Hassani ametoa maelekezo hayo kwa nchi nzima kuwa maeneo yote lazima  yatambulike kwa sababu ni sera ya taifa ya mwaka 2003 ya posta kuwa ifikapo 2025 kila nyumba, taasisi, biashara, hospitali na maeneo mengine yote na barabara yawe na namba zinazoeleweka

Aidha Mkuu wa Wilaya amewaeleza wananchi lengo la kuweka  anwani  za makazi litawaletea manufaa makubwa katika shughuli mbalimbali wanazozifanya ikiwepo biashara mtandaoni, kurahisisha shughuli za tafiti na upatikanaji wa taarifa, kuimalisha ulinzi na usalama pamoja na upatikanaji wa huduma kwa urahisi katika maeneo husika.

Mh. Kaminyoge  ametoa wito kwa viongozi wote kuanzia ngazi ya Kitongoji, Vijiji, Kata na Ofisi ya Mkurugenzi waendelee kutoa  elimu ili kurahisisha zoezi hilo na kuwapa ushirikiano na mazingira wezeshi vijana wote waliopata mafunzo ili waweze kufanya  kazi kwa ubunifu na weredi mkubwa kwa sababu zoezi hilo linatakiwa kukamilika ifikapo April 15.