DC ANNEY ATETA NA WATUMISHI WA MASWA, ASISITIZA UBUNIFU KATIKA KAZI NA UKUSANYAJI WA MAPATO

Posted on: March 7th, 2025

Mkuu wa Wilaya ya Maswa Mh. Dkt Vincent Anney  tarehe 07 Machi, 2025 amepata fursa ya kujitambulisha na  kuzungumza na Watumishi wa Wilaya ya Maswa katika ukumbi wa Ofisi ya Mkuu wa Wilaya.

 Mkuu wa Wilaya amewataka watumishi wa Wilaya ya Maswa  kuwa wabunifu katika kazi zao na maisha yao binafsi pamoja na kusimamia ukusanyaji wa mapato katika vyanzo walivyonavyo na kubuni vyanzo  vipya vya mapato ambavyo vitaisaidia kuongeza mapato katika Wilaya ya Maswa.

Pia Mh.Dkt Anney amewataka Wakuu wa Idara na viongozi wa ngazi zote kuhakikisha wanashirikiana kikamilifu katika usimamizi wa miradi ya maendeleo ili ikamilike kwa wakati ambapo amesisitiza ifikapo Aprili 30, 2025 miradi yote inayotekelezwa iwe imekamilika.

Aidha Mkuu wa Wilaya ametoa wito kwa  mamlaka ya mji  mdogo Maswa kusimamia usafi wa mazingira kwa  kuhakikisha wanaweka mfumo mzuri wa ukusanyaji wa taka na kuandaa dampo la taka ambapo taka zote zitatupwa hapo ili  mji wa Maswa  uwe safi.

Sambamba na hilo pia amewataka watumishi wote kuhakikisha wanawahi kazini na kujiepusha na utoro ili waweze kuwatumikia wananchi kwa weredi.