Bilioni 3.1 kujenga miundombinu ya Shule Maswa

Posted on: July 3rd, 2023

Halmashauri ya Wilaya ya Maswa ni miongoni mwa Halmashauri zilizonufaika na Fedha kutoka SEQUIP kwa ajili ya ujenzi wa shule mbili za sekondari katika Kata ya Kulimi, Kata ya dakama na ujenzi wa nyumba za walimu aina ya two in one katika shule ya sekondari Mashimba na Shule ya sekondari Nyongo.

Hayo yamesemwa na Mkuu wa Wilaya ya Maswa Mhe. Aswege Kaminyoge leo tarehe 03.07.2023 wakati akiendelea na ziara ya kukagua miradi ya maendeleo inayotekelezwa na serikali kupitia mradi wa Boost katika Tarafa ya Mwagala

Mkuu wa Wilaya amesema kuwa serikali ya Jamhuri ya Muungano wa Tanzania imepokea Fedha kwa ajili ya ujenzi wa shule mpya ya Sekondari Kulimi ambayo mradi wa ujenzi huo utagharimu kiasi cha shilingi milioni 584, ujenzi wa shule mpya katika Kata ya Dakama ambayo nayo imepewa kiasi Cha shilingi milioni 584, ujenzi wa nyumba ya mwalimu katika shule ya Sekondari Mashimba na Shule ya Sekondarii Nyongo ambazo kila nyumba itagharimu kiasi Cha shilingi milioni 100 Fedha ambazo zimetolewa na serikali kupitia mradi wa Secondary Education Quality Improvement Program (SEQUIP).

Mhe. Kaminyoge ametoa wito kwa wataalamu kutoa Elimu kwa kamati za ujenzi ili waweze kuelewa majukumu yao na kuepusha migogoro katika utekelezaji wa miradi hiyo.

Akiwa katika ziara hiyo Mkuu wa Wilaya amekagua ujenzi wa Soko katika mji wa Maswa awamu ya pili ambalo lipo katika hatua ya ukamilishaji, Fedha zilizotumika katika mradi huo ni shilingi milioni 55 ambazo zimetolewa na mfuko wa Jimbo. Ujenzi wa shule mpya ya msingi iliyopo Kijiji cha Mwakabeya Kata ya Ipililo yenye mkondo mmoja wenye madarasa 9, matundu ya vyoo 16 pamoja na jengo la Utawala moja jumla ya shilingi milioni 348,500,000/= zimetolewa na serikali kupitia mradi wa BOOST kutekeleza mradi huo.

Aidha ametembelea ujenzi wa vyumba vitatu vya madarasa na matundu matatu ya vyoo katika shule ya msingi Ipililo “B” mradi huo unatekelezwa na BOOST ambapo kiasi Cha shilingi milioni 81,300,000/= kimetolewa, ujenzi wa vyumba viwili vya madarasa na matundu matatu ya vyoo katika shule  ya Msingi Nguliguli wenye thamani ya Shilingi 56,300,000/= ambapo miradi yote ipo katika hatua ya ukamilishaji.

Akizungumza kwa nyakati tofauti mkuu wa wilaya amesisitiza kamati ya ujenzi kushirikiana na mafundi kwa karibu ili kuwezesha miradi kukamilika kwa wakati, pamoja na  kutatua changamoto zinazojitokeza wakati wa utekelezaji wa miradi hiyo.

Mhe. Kaminyoge amemwagiza Mhandisi wa Wilaya kupanua Soko kuu la Maswa  ili liweze kuwa na vizimba 30 ambavyo vitawawezesha wafanyabiashara 30 kutumia Soko hilo ambalo kwa sasa lina vizimba 20 ambayo havitoshelezi mahitaji ya wafanyabiashara hao.

Ujenzi wa madarasa

Ujenzi wa Soko