Vijana wa Kike chini ya mradi wa Vijana Tunaweza wakutana na viongozi wa Serikali

Posted on: September 24th, 2021

Vijana wa Kike chini ya Mradi wa Vijana tunaweza unaofadhiliwa na shirika la UNFPA na kutekelezwa na Restless Development wamekutana na Viongozi wa serikali Wilayani Maswa leo tarehe 24/09/2021.

Mradi wa Vijana Tunaweza ni mradi wa kuwezesha wasichana unaotekelezwa  na Restless Development wenye lengo la kupunguza visababishi  vinavyopelekea wasichana kuingia kwenye maambukizi ya VVU na UKIMWI, mimba zisizo tarajiwa ukatili wa kijinsia na ndoa za utotoni. Vijana tunaweza hutumia mbinu shirikishi ambayo inapambania  elimu ya makuzi, haki na afya ya uzazi uwezeshaji wa kiuchumi  na kuwajengea kujiamini katika kufanya maamuzi yanayogusa maisha yao.

Ndani ya Wilaya ya Maswa mradi huu ulianza mwaka 2021 mwezi 3 na unawafikia mabinti wenye uzao mmoja 30 wakiwa wameunganishwa  kwenye vikundi vidogo 3 ndani ya kata ya Lalago, Badi na Sola hapa Wilaya ya Maswa. Katika kufanikisha  utekelezaji wa mradi huu, shughuli mojawapo  ni vijana kukutana na viongozi wa Serikali na wadau wengine mbalimbali ambao wanamchango mkubwa katika kufanikisha maendeleo ya vijana  na kuwasilisha maoni na mapendekezo, kujadiliana nao katika ufumbuzi wa changamoto mbalimbali na kutengeneza mahusiano mazuri na endelevu.

Kati ya Mambo yaliyojadiliwa na vijana wa Kike Kutoka Katika Kata ya Badi, Sola na Lalago ni pamoja na :-

1. Huduma rafiki ya afya ya uzazi kwa vijana
2. Ukatili wa kijinsia
3. Uwezeshaji wa wanawake na wasichana kiuchumi
4. Ushiriki na ushirikishwaji katika maamuzi

Kaimu Mkurugenzi katika kuhitimisha aliwahakikishia vijana kuwa  kupitia katika vikundi  vyao watapata mikopo ya kisheria itolewayo na Halmashauri kwa  Vijana , Wanawake na Watu wenye ulemavu, pia aliwaagiza watendaji wote walio chini yake kuhakikisha wanasikiliza kero za Vijana wa kike na kuzitatua pindi zitokeapo ikiwa ni pamoja na kuwashirikisha katika vikao ili watoe maoni  na mapendekezo yao.

Aidha Kaimu Mkurugenzi  Mtendaji aliwashukuru sana  Viongozi wote walioanzisha Mradi huu wa Vijana tunaweza kwa nia yao njema ya kuwajengea vijana wa kike uwezo wa kujiamini na kuwainua kiuchumi.