Usafi ni Afya, Usafi ni Maendeleo

Posted on: September 16th, 2023

Afisa usimamizi wa Usafi Halmashauri ya Wilaya ya Maswa Ndg. Budodi Walwa amewashukuru watumishi wote  pamoja na Wananchi wote wa Wilaya ya Maswa kwa kuitikia wito wa kufanya Usafi katika maeneo mbalimbali ya Wilaya ya Maswa ambapo lengo likiwa ni kuzuia magonjwa ya mlipuko katika jamii na uchafu.

Ndg. Budodi amesema hayo leo tarehe 16.09.2023 wakati wa  maadhimisho ya siku ya Usafi Duniani ambapo Wilaya ya Maswa imeadhimisha siku hiyo kwa watumishi wa sekta mbalimbali kufanya Usafi katika Hospitali ya Wilaya ili kulinda Mazingira hayo.

Ameongeza kuwa siku hiyo ni muhimu sana kwa sababu inawahimiza wananchi kufanya Usafi ili kuepukana na magonjwa mbalimbali na pia wananchi wanatakiwa kushirikiana katika kuhamasishana ili waweze kukaa katika Mazingira yaliyo Safi ambayo yatawawezesha kufanya maendeleo yao vizuri.

Kwa upande wake msimamizi wa soko la jioni ambaye pia ni Mwenyekiti wa Kitongoji Ndg Fadhiri Hamisi amesema wananchi wamehamasika Sana kufanya Usafi katika siku hiyo maalumu ya Usafi Duniani na wameahidi kuendelea kufanya Usafi katika Mazingira yao hasahasa katika soko hilo kwa kuwa linahudumia wananchi wengi.

Siku ya Usafi Duniani huadhimishwa Kila mwaka tarehe 16 Septemba ambapo lengo ni kuepusha Dunia na matatizo yanayosababishwa na uchafu ikiwemo uchafu wa Mazingira katika maeneo mbalimbali.

Maadhimisho hayo katika Wilaya ya Maswa yameambatana na michezo mbalimbali ambayo imefanyika ikiwepo mazoezi ya mwili ambapo mkuu wa Wilaya Mhe. Aswege Kaminyoge ameongoza mazoezi hayo pamoja na watumishi wote wa Wilaya ya Maswa.

"Kauli mbinu ikiwa tuungane wote kwa pamoja kuhimiza na kuhamasisha kudhibiti taka"