Kiongozi wa mbio za Mwenge wa Uhuru kitaifa aipongeza Maswa

Posted on: July 11th, 2022

Kiongozi wa mbio za Mwenge wa  Uhuru kitaifa mwaka 2022  Ndg.  Sahili Geraruma  ameipongeza Halmashauri ya wilaya ya Maswa kwa kutenga eneo la uwekezaji kwa ajili  ya uwezeshaji wa vikundi  vya vijana, watu wenye ulemavi na wanawake ili waweze  kufanyia shughuli zao za maendeleo ya kiuchumi.

Akizungumza wakati  wa uwekaji jiwe la msingi eneo la uwekezaji lenye thamani ya shs 55,785,096.60 katika kiwanda Cha mikate lishe kilichopo Kijiji Cha  Ng'hami, Kata ya Nyalikungu leo tarehe 11 julai 2022 kiongozi wa mbio za Mwenge wa Uhuru kitaifa amesema Halmashauri ya Wilaya ya Maswa imeupiga mwingi katika suala zima la uwekezaji kwa kuanzisha viwanda na miundombinu yote inayohitajika katika uwekezaji ikiwepo umeme na maji.

"Mradi ni mzuri pongezi kubwa sana kwa Mkurugenzi mtendaji, kazi nzuri umefanya" amesema Geraruma.

Katika hatua nyingine Mwenge wa Uhuru  umezindua mradi wa ujenzi wa vyumba vinne vya madarasa katika Shule ya Sekondari Ipililo Kijiji Cha Ipililo wenye thamani ya shs 91,941,000/=  uwekaji jiwe la msingi katika jengo la wagonjwa wa dharura hospitali ya wilaya ya Maswa uliaogharimu shs 300,000,000/=, mradi wa ujenzi wa Tanki la maji katika kata ya Nyalikungu  wenye thamani ya shs 497,372,690.40 pamoja na ujenzi wa Barabara ya kiwango Cha lami kilomita moja uliogharimu shs 499,999,270/=.

Kiongozi wa mbio za Mwenge wa Uhuru kitaifa ameipongeza wilaya ya Maswa kwa kuwa Mwenge wa Uhuru umepitisha miradi yote na amewaomba viongozi wote kushirikiana kuanzia ngazi ya chini mpaka juu kwa ajili ya maendeleo ya Maswa.

Kwa upande wake Mbunge wa Jimbo la Maswa Mashariki, Mwenyekiti wa kamati ya huduma na maendeleo ya jamii, pia mjumbe wa Halmashauri  kuu ya CCM Taifa Mh. Stanslaus  Nyongo  amempongeza  Mh.  Samia Suluhu Hassani Rais wa Jamhuri ya Muungano wa Tanzania kwa kutoa zaidi ya shs bilioni 30 kwa ajili ya kutekeleza shughuli za maendeleo katika Wilaya ya  Maswa katika mwaka huu wa fedha.

Aidha Geraruma amewaomba wananchi wa wilaya ya Maswa  kushiriki katika zoezi la sensa ya watu na makazi litakolofanyika Augusti 23, 2022 ili serikali iweze kujua takwimu sahihi ya idadi ya watu kwa ajili ya utekelezaji wa dira ya maendeleo ya mwaka 2025, "Sensa ni msingi wa mipango ya maendeleo shiriki kuhesabiwa tuyafikie maendeleo ya taifa".

Awali akipokea Mwenge wa Uhuru katika Kijiji cha Mbugamita Kata ya Senani ukitoka Wilaya ya Meatu Mkuu wa Wilaya ya Maswa Mh. Aswege Kaminyoge alisema mwenge wa uhuru utakimbizwa Kilomita 153 kukagua miradi mitano katika Wilaya ya Maswa.