Kikao cha Katibu Tawala Mkoa wa Simiyu, wadau wa Elimu Wilayani Maswa

Posted on: January 19th, 2018

Leo tarehe 19/1/2018 Katibu Tawala wa Mkoa wa Simiyu Ndg. Jumanne A. Sagini amefanya kikao maalumu na wadau wa elimu katika ukumbi mkubwa wa Halmashauri ya Wilaya ya Maswa kilicholenga suala zima la kusimamia taaluma ili kuinua kiwango cha elimu.

Kikao kimejumuisha Wakuu wa Idara, Maafisa Elimu Wilayani na Kata, Wakuu wa Shule na Walimu Wakuu Wilayani Maswa. Kiongozi huyu amewataka wakuu wa Idara na Vitengo kuwa na ushirikiano wa pamoja katika kusimamia suala zima la elimu Wilayani Maswa ili kuinua kiwango cha ufaulu.

Amesema “pamoja na wingi wa wanafunzi, uchache wa walimu, mwitikio hafifu wa Wazazi katika suala la elimu hapa Wilayani, changamoto hizi zote na nyinginezo zisitufanye tubweteke bali tunatakiwa kujipanga kusimamia suala zima la elimu kwa kutumia taaluma tulizonazo”. Amesisitiza walimu wasimamie taaluma na siyo kazi nyingine.

Amewataka Maafisa Elimu Kata, Wakuu wa Shule na Walimu Wakuu wawachukulie hatua / wawajibishe Walimu walevi, watoro na wasiofundisha ipasavyo kwa mujibu wa sheria taratibu na kanuni za kazi. Ameongeza kwa kusisitiza kuwa Watumishi walevi, watoro kazini na wasiotimiza wajibu wao siyo rahisi kupandishwa daraja / cheo pamoja na watumishi wanaowajibika.

Aidha Katibu Tawala Mkoa wa Simiyu amewaagiza Wakuu wa Shule na Walimu Wakuu wasio na kipindi hata kimoja cha kufundisha kwa wiki kuanzia sasa wawajibike pia kufundisha. Ameenda mbali kwa kuwataka Maafisa Elimu Kata pia wapate muda wa kwenda kufundisha.

Kwa kupiti kikao hiki Afisa Elimu Mkoa wa Simiyu Ndg. Julius Nestory ametoa maagizo yafuatayo:

1. Kila Afisa Elimu Kata au Mkuu wa Shule au Mwalimu Mkuu asiyekaa katika eneo lake la kazi wamepewa siku saba (7) kuanzia leo wawe wamehamia katika maeneo ya vituo vyao vya kazi.
2. Wakuu wa shule, Walimu wakuu na walimu wote kwa ujumla wasifike Ofisi za Mkurugenzi au Mkuu wa Mkoa kwa ajili ya kufikisha taarifa bali wawakabidhi Maafisa Elimu Kata kufikisha taarifa hizo kwani wao wana nyenzo au usafiri wa kuwafikisha katika vituo hivyo na kurejesha taarifa hizo.

Katika kuhitimisha Katibu Tawala Wilaya ya Maswa Ndg. Rutalemwa P. Rutagumirwa amesema kila Mwalimu atimize wajibu wake ili kuweza kuinua kiwango cha elimu Wilayani Maswa. Amesisitiza kwa kauli mbiu hii “Kwa pamoja tuseme tutabadilika na tutaleta mageuzi ya Elimu, hivyo ufaulu utaongezeka Wilayani Maswa”